Fesrede

Names de organisatie van dizze daag
heesj ich Uch va hatte welkom en vier
wille Uch bedanke vuur de belangsjtelling
dames en here.

Nogmoals geachte aanwezige, dier
zeet allemoal zónger oetzóndering va
hatte welkom.

In ’t biezónger maag ich begroete van ’t
Ministerie van Cultuur, Professor Doctor
A.B.See, direktuur van cultuur. Logiese
funktienaam professor!
Óch veul ich mich verierd welkom te
moage heesje:
mevrouw J.B.H.G.Spek-Bonen
Hoofd Staatscommissie CABA (Cultuur
en Aanpalend Beleid Algemeen) en lid
van ZNT (Zuid-Nederlands Taalgebied).

Tegeliekertied óch höare chauffeur,
umdat me toch mag aanumme dat óch
deë miensj get aaf wit van SBS
(Sjproak-Bazel-Sjrieve).
Doaneëve mót ich - en ich doeën dat
mit vöal genoege - Uche biezóngere
aandach vroage vuur
Mr.Drs. Karel Luns.
’t Maag Uch dudelik zieë meneer Karel
Luns dat ich bewus Uche volledige
vuurnaam num.
Vuur Uch meneer Karel Luns sjpreëk
ich ós biezónger simpatie oet vuur ’t
werk dat dier al die joare hat gedoa
vuur de Limburgse sjtrieëktale.
Dat dier tot de konklusie zeet gekoame
dat ’t Heëlesj ing flónkerend-
sjtroalende sjter is, mak Uch neet alling
simpatiek, mè bewies óch Uch groeëte
deskundigheed.
Óch zint vier blie dat d’r heer Peters
óp dizze vriedig aanwezig is.
Heë is conservator van ’t Hunnebeds,
ing ouw Drentse taal, wie dier zalt wete.

De representante van zieëve
provincies en dreiendartig gemeentes
vergeëte vier zieëker neet te numme.
Dier hat sjienbaar allemoal get mit
cultuur in Uch dageliks werk.
Sjoeën dat dier hüj óch hei zeet mit
uch leëvespartners.
D’r - helaas te vreug gesjtorve -
meerlandicus Fritz Fransen,
dames en here, hat ’t manuscript
geleëze en sjient óp zie sjterfbed
gezag te han dat dees introductie
belangriek geach mót weëde vuur
de miensjheed.

Begriepelik dus dat dier allemoal
zeet gekoame, geachte aanwezige.
De anger lüj die ich neet bei naam
han geneumd, hant doa hoapelik
begrip vuur.
Doa kumt nog bei dat ich óch
Uch belangsjtelling meen te
besjpure vuur de oetgebreide
kaod- en werm buffette
die in de oetnuëdiging sjtónge
vermeld.

Vier begriepe óch waal dat dier
de gratis buffette as beizaak
besjouwt en dat Uche aandach
gans bei ’t doel van dees
beieenkoms is.

Ich sjleet noe aaf dames en
here en wunsj Uch dat dier
tevreie óp dizze daag zalt
truuk kieke.
Ich zelf zal al tevreie zieë
went de helf van de lüj die vuur
de buffette zint gekoame,
óch geïnteresseerd zint
in dit book.

Ich dank uch!